Bilboko manifestazioa zuzenean Hamaikan eta 'Berria.info'-n

Egin Dezagun Bidea mugimenduak presoen eskubideen alde antolatutako manifestazioa zuzenean jarraitu ahalko da gaur irrati, telebista eta Internet bidez.

Hamaika izango da manifestazioa emango duen telebista bakarra. Bilboko martxa hasi orduko abiatuko dute saio berezia, 17:30ean. Manifestazioaren irudiak zuzenean jasotzeaz gain, testigantza ugari eskainiko dituzte. Alderdi politiko, sindikatu eta eragile sozialetako ordezkariak elkarrizketatuko dituzte. Bestetik, aldez aurretik grabatutako euskal preso politiko ohien eta presoen senideen hitzak entzun ahalko ditu ikus-entzuleak. Bilbora gerturatuko diren herritarren iritzia ere eskainiko dute. Gainera, herri mobilizizazioari amaiera emango dion azken ekitaldia zuzenean emitituko dute. Manifestazioa bukatutakoan, Bilboko Udaletxetik bertatik azken balorazioak jasoko dituzte. Hamar laguneko taldea ariko da saioa egiten. Hamaika Telebistaren zuzeneko saioa amaitu eta gutxira, 21:30etik aurrera, saio osoa berriro ikusteko aukera izango da.

Berria.info webguneak Hamaika telebistaren saioa emango du zuzenean. Hartara, mundu osoan ikusi ahalko da manifestazioa. Aurretik, eguerdian Bilbon bizi den giroaren bideoak egingo ditu Berria telebistak. Webgunean, halaber, mobilizazioaren inguruko xehetasun guztiak eta unean uneko argazkiak jarriko dituzte.

Berriketan.info sare sozialean zuzeneko kontaketa egingo dute BERRIAko kazetariek. Halaber, deialdia egin dute nahi duten herritarrek kontaketa egin dezaten. Twitterreko kontua, esate baterako, Berriketan.info-rekin lotzeko aukera dago.

Irratiz ere jarraitu ahalko da presoen aldeko manifestazioa Info7 irratiaren bitartez. Casillatik egingo dute saio berezia, 16:30etik aurrera. Bertan, eragile politiko, sindikal eta sozialetako ordezkariak elkarrizketatuko dituzte. Hainbat preso ohi, iheslari eta senideen testigantzak ere jasoko dituzte, baita Bilbora gerturatuko diren herritarrenak ere. 17:30etik aurrera, manifestazioaren zuzeneko jarraipena egingo dute.

Euskadi Irratian bat egingo dute zuzenean manifestazioarekin, eta orduroko albistegietan emango dute haren berri. ETB1en, ordu berean, Deportivo-Xerez futbol partida emango dute.