«Ondo bizitako bizialdi luze baten alde» egin nahi du aurten EITBk elkartasun maratoia. Bizi bedi bizipoza! lelopean, «zahartze osasuntsuan» jarriko dute arreta. Osasun fisikoa eta mentala mantentzeko eta hobetzeko, ikerketarako dirua bilduko dute: hain zuzen ere, BIOEF Berrikuntza eta Ikerkuntza Sanitarioko Euskal Fundazioari emango diote jasotako dirua.
«Nork bere burua zaindu beharraz kontzientzia hartzea da xedea. Eguneroko ongizatearen aldeko prebentzioa eta berrikuntza bultzatzea», azaldu dute EITBko ordezkariek. Isabel Octavio EITBko Estrategia eta Komunikazio Korporatiboko zuzendariak nabarmendu du kanpainak bere fruituak emango dituela: «Kanpainaren lehen urratsetan baino ez gaude, baina baditugu osagaiak elkartasun sare handi bat egiteko».
Zahartzaroaren alorrean ikertzen eta berritzen jarraitzea eta erreferentziazko programa espezifikoetan sakontzea da kanpainaren helburua. Nagusilan elkarteko eta BBK Sasoiko elkarteko arduradunek parte hartu zuten atzo kanpainaren aurkezpenean, Bilbon. Baita Iñaki Gutierrez Ibarluzea Eusko Jaurlaritzako Ikerketa, Berrikuntza eta Ebaluazio Sanitarioko zuzendariak ere.
Maratoiaren egun handia abenduaren 18a izango da. Baina dagoeneko martxan dago dohaintzak egiteko aukera Bizum bidez, 33478 zenbakian.
Kanpainaren soinu banda Niko Etxart musikariaren Euskal rock n' roll abestia izango da.
