EITBk 'Uhin ultramoreak' zientzia podcasta estreinatuko du

Elhuyarrek ekoitzitako Uhin ultramoreak zientzia podcasta estreinatuko du gaur EITB Podkast atariak. Bi astean behin emango dute, Zientzia.eus atarian ere jarriko dute, eta ikasturtearen amaiera arte egingo dute. Gidariak Ana Galarraga eta Alaitz Otxoa izango dira.

Galarragak iragarri du zientzia «modu ulergarrian» helarazi nahi dietela entzuleei, «irizpide kritiko eta feminista batekin». Atalen artean, gaurkotasun zientifikoa landuko dute, gai bat aztertuko dute sakonean, eta jolas batean soinu misteriotsu bat asmatu beharko dute entzuleek. «Halaber, lau galdera egingo ditugu, eta entzuleek erantzun beharko dute 'egia', 'gezurra' ala 'ez dago nahikoa ebidentzia'», aurreratu du Galarragak. «Estereotipoak hautsi nahi ditugu: zientzia urruna eta zurruna denik ukatzera goaz», gaineratu du esatariak.