Imanolen, Mikel Laboaren eta Xabier Leteren kontzertuak Aste Santuan

Hiru kantari gogoan izenburupean, ETB1 kateak Imanol, Mikel Laboa eta Xabier Leteren hiru kontzertu «gogoangarri» emango ditu Aste Santuan. Ostegun gauean, Imanolek 1992. urtean emandako kontzertu bat ikusi ahalko da; igandean, Laboak 1999an emandako bat; eta astelehenean, Letek 1991n egindako bat.

Sautrela literatur saioko taldea arduratu da Hiru kantari gogoan emankizuna prestatzeaz. Hala, kontzertu bakoitzaren aurretik Hasier Etxeberria kazetariak aurkezpen bat egingo du; kantari bakoitzaren ibilbidea laburtuko du Etxeberriak aurkezpen horietan. Berezitasunak badituzte aurkezpen horiek: Imanol Lartzabalena Donostiako Antigua auzoan grabatu dute; Laboarena, Agina mendian —kantariaren errautsak bota ziren lekuan—; eta Leterena, Oiartzungo Madalensoro kiroldegian. Aurkezpen horretan, Antton Valverdek duela hogei urteko kontzertuaren gaineko galdera batzuei erantzungo die.

Ostegunean emango duten Imanolen kontzertua 1992koa da. Donostiako Antzoki Zaharrean egin zuten, eta, bertan, Imanolek hiru musikari izan zituen lagun: Karlos Jimenez pianoan, Txema Garces baxuan eta Josetxo Goia saxofoian. Imanolen kantutegiko abesti ezagunenak entzun ahalko dira; besteak beste, Zure bularretan, Ni poeta kaxkar bat naiz eta Barne kanta.

Mikel Laboak Donostiako Viktoria Eugenian egin zuen kontzertua, 1999an, eta oihartzun handia izan zuen. Bi zati ditu: aurrenekoan, Iñaki Salvador piano jotzailea eta Josetxo Silgueiro saxofoi jotzailea ditu lagun Laboak; bigarrenean, berriz, Euskadiko Gazte Orkestra eta Donostiako Orefoia ditu lagun. Bigarren zati horretan entzungo dira Txoria txori, Haize hegoa, Gernika eta Laboaren beste kanta mitiko batzuk.

Hiru kantari gogoan emankizuna ixteko, pazko astelehenean Xabier Letek duela hogei urte Oiartzungo Madalensoro kiroldegian egin zuen kontzertua ikusi ahalko da. «Lete oparo bat ageri da, ez bakarrik kantatzen, baizik eta kantuen arteko hizketaldi zoragarriak egiten», azaldu du emanaldia prestatu duen taldeak. Ni naiz, Habanera eta Xalbadorren heriotzean dira kontzertu hartako kantetako batzuk. Antton Valverderekin batera aritu zen kontzertu hartan Lete.