«Gorrotatzea ez dago gaizki: irizpiderik ez izatea da gaizki dagoena». Hala dio Maider Uriartek. Gorroto izeneko podcasta aurkezten hasi da EITB taldearen Guau plataformarentzat. Gorrotagarri diren gauzetan du oinarria podcast berriak. «Besteekin gaudenean isilik gordetzen ditugun iritzi edo pentsamenduak mahai gainean jartzeko gunea da, terapia egiteko lekua, betiere umorez», azaldu du Uriartek. «Izan ere, gorrotoa da mundua mugiarazten duten indarretako bat».
Aste honetan sareratu dute podcastaren aurreneko atala. Irati Erauskin elkarrizketatu dute, eta ezkontzen inguruan hitz egin. Ezkontzak gorrotatzeaz, bide batez.
Hamar atal izango ditu saioaren lehen denboraldiak, eta hauek izango dira gonbidatuak: Kiliki Frexko, Jone Zalduegi, Bittor Barandiaran, Eider Garcia Durana, Joseba Agirre eta Iñigo Aranburu. Astero atal bat sareratuko dute. Ulu Media ekoiztetxearen produkzio bat da.
'Barruan gaude', bueltan
Ulu Mediak egiten duen Barruan gaude elkarrizketa saioak denboraldi berria hasiko du gaur. Podcast horretan, Oier Aranzabal kazetaria atal bakoitzeko protagonistaren etxean sartzen da elkarrizketa bat egitera. Aranzabalek Scott Zuñiga artistaren etxean sartu ditu mikrofonoak denboraldiko lehen atalean. Denboraldiak zortzi atal izango ditu guztira.
