Kepa Junkera musikariak iktusa izan zuen duela bost urte. Eszenatik irten zen orduan, baina musikariak sortzen jarraitzen du gaur egun. Junkeraren gertuko pertsonen lekukotza lagun, EITBren Primeran plataformak Berpiztu izeneko dokumental saioa estreinatuko du bihar.
Musikariaren sustraietara joz hasten da dokumental saioa. Trikiti lehiaketetako lehen emanaldiak ikusi ahalko dira. Bigarren atalean, Junkeraren ibilbide luzea errepasatzeaz gain, iktusaren ondoren bere errekuperazio prozesua nolakoa den erakutsiko dute. Senideak eta lagunak azalduko dira hizketan. Hirugarren atalean, Junkerak musika bidaide izan dituenak azalduko dira. Ikus-entzunezko bidaia horretan, Junkeraren egunerokoa nolakoa den erakutsiko dute. Busturiko (Bizkaia) bere etxean azalduko da Junkera hizketan, Oliene baserrian. Laugarren atalean, azkenik, musikariaren sormenaren ertz guztiak aztertzen saiatuko dira.
Bihar bertan, Junkerak Fidias fundazioarten aldeko elkartasun ekitaldi batean parte hartuko du, Bilbon. Mediolanum fundazioaren egoitzan izango da ekitaldi hori, 19:30ean.
Iazko irailean, Donostiako Zinemaldian, Fermin Aiok Kepa Junkera: Berpiztu dokumentala aurkeztu zuen. «Lortu dugu Keparen ibilbidea ondo kontatzea, eta hori ondo nahastuta dago haren oraingo egoerarekin», esan zion Aiok BERRIAri. Dokumental haren egokitzapena da bihar Primeran-ek estreinatuko duen saioa.
Primeran plataformak, bestalde, beste estreinaldi bat egingo du aste honetan. Memoria historikoarekin lotutako Desagertuak, norenik gabeko lurpean dokumentala sareratuko du larunbatean. Bad education telesailaren atalak ere ikusgai jarriko ditu.
