Mahastiz betetako Arabako Errioxako paraje ederrak begitantzen ditugunean, haien inguruan, noiz edo noiz, olibadiak ere topa ditzakegu. Lantziegoko lurrak horien isla dira; bertan dago Erroiz Olioak, eta han egingo da aurten ere bisita gidatua eta dastaketa BERRIAlagunekin. Olioa lortzeko lurra lantzen duten mimo berarekin lantzen dute hizkuntza Erroizen; hari mutur horri tiraka eskaini nahi dio BERRIAlagunei esperientzia, tokiko nekazaritza jasangarriari esker lortutako uzta, BERRIAren komunitateko kideei hurbiltzeko asmoz.

Bisitak bi ordu iraungo du: lehenik, olibadi bat bisitatuko dute BERRIAlagunek; bigarrenik, herriko dolare kooperatibo zaharrera joango dira; eta, azkenik, Erroiz Olioak-en dolarean, askotariko olioen berri izango dute, eta batzuk dastatzeko aukera ere bai.
BERRIAlagunentzako antolatutako esperientzia hau urriaren 4an izango da, 11:00etan, Lantziegon, Araban. Ibilaldiaz gozatzeko 5 euro ordaindu beharko dira, bertaratzea bermatzeko asmoz, eta hogei lagunek gozatu ahal izango dute esperientziaz.