BERRIAren zutabeetako bat da Iritzia, eta habe hari eusten diote, egunero, Maialen Akizuk eta Andoni Egañak, hitz lauz. Kantuan egingo dute oraingoan: euren hitzen gainean etzanda, ala haien jiran, bertsotan.

Buruz buru arituko dira bi bertsolariak, Bilboko Bira kulturgunean, eta Maddi Ane Txoperena BERRIAko dokumentalista eta bertsolariak jarriko dizkie gaiak, Egañaren Hitz etzanak eta Akizuren Jira zutabeetatik hartutako ideietatik tiraka.

Urriaren 10ean izango da bertso saioa, ostegunarekin, 19:00etan. Sarrerak BERRIA dendan eskuratu ahal izango dira bukatu arte edo urriaren 8ra arte; sarrera orokorra 8 euroan erosi ahalko da, eta BERRIAlagunek eta birakideek sarrera merkeago izango dute, 6 euroan.