Juan Antonio Bayonaren bi film ezagun eta arrakastatsuko gidoilaria izan zen Sergio G. Sanchez -El orfanato eta Lo imposible-, eta zuzendaritzara jauzi egiterako orduan film haietako lehenengoan jorratutako beldur giroetara itzuli da Marrowbone-n. AEBetan eta ingelesez filmatua, pelikulak Marrowbone familiak etxe zahar batean jasan beharko duen amesgaiztoa kontatzen du. Aitarengandik ihesi iritsi dira bertara, eta ama hil ostean, lau seme-alabek mehatxuzko presentzia bati egin beharko diote aurre.
Filma Sail Ofizialean aurkeztu dute, lehiaz kanpo, eta gaur gauean berriro emango dute Kursaaleko auditoriumean, 22:00etan.
Gaur beste bi pelikula emango dituzte Sail Ofizialean, hauek bai Urrezko Maskorra lortzeko lehian: Soldatii. Poveste din ferentari, Ivana Mladenovicek (Serbia, 1984) fikzioaren esparruan filmatu duen lehen lana -aurretik dokumental bat eta hainbat labur ditu eginak-, eta Sollers Point, Matt Porterfield ikus-entzunezko artistaren (AEB, 1977) laugarren film luzea.
