Denis Itxaso Gipuzkoako Kultura eta Turismoko diputatuak eta Xabier Agote Albaola euskal itsas ondare kulturala zabaltzeko elkartearen lehendakariak lankidetza hitzarmena sinatu dute San Joan baleontziaren erreplika eraikitzeko, hartara egonkortasuna emateko proiektuari eta "lehen mailako erakartzaile turiskoa" bihur dadin. Horrenbestez, Albaolari 200.000 euro emango dizkio diputazioak erreplika eraikitzeko eta proiektu horrek orain dituen beharrei erantzuteko. Gainera, 2017rako fundazio publiko bat sortzea nahiko lukeela adierazi du Itxasok.
XIV. mendean Kanadako uretan hondoratutako baleontziaren erreplikaren proiektua Donostia 2016 kultur hiriburutzaren ikurretako bat izan zen hasieran, eta aurten Europako urak zeharkatuko zituela aurreikusten zen. Gerora, ordea, proiektuaren arduradunek jakinarazi zuten ezinezkoa izango zela aurten amaitzea erreplika.
