Amaia Romero abeslari iruindarraren emanaldiarekin eman diote hasiera Flamenco on Fire jaialdiaen bortzgarren edizioari. Gaur eguerdian hasi da Iruñeko musika jaialdi flamenkoaren bortzgarren edizioa, eguerdiko ordubatean. Iruñeko udaleko balkoian kantatu du Espainiako telebistako Operacion Triunfo lehiaketa irabazi zuen artista gazteak.
Berarekin batera igo dira udaletxeko balkoiara Pepe Habichuela, Jose Miguel Carmona eta Marta Robles gitarristak, baita Carlos Itoiz Iruñeko 86 urteko artista ere.
Udaletxe plaza jendez bete da Amaiaren ahotsa entzuteko. Bertzeak bertze, Ay pena, penita, pena kanta entzun ahal izan dute bertara gerturatu direnek.
Sei egunez Iruñea flamenkoaren hiriburu bihurtuko du Flamenco on Fire jaialdiaren bortzgarren edizioak. Aurtengo ediziorako, publiko zabalarentzako ekintzak antolatu dituzte jaialdiko arduradunek. Ospe handiko artistak egongo dira, baina, baita formatu txikiagoko kontzertuak ere. Aurten, gainera, arreta berezia ezarriko dute emakume flamenkoen lanean.
