Gasteizko Artiumen egin den ekitaldian Fernandezek hiru sariak emateko arrazoiak aletu ditu. Ana Laura Alaezi bere arte ibilbideagatik eman diote saria; June Crespori bere sorkuntza lanagatik; eta hirugarrenik, Adelina Moyari, ikusizko eremuan egin duen jardueragatik. Lourdes Fernandez epaimahiburuak hirurak emakumeak izatea nabarmendu du.
Ana Laura Alaezek (Bilbo, 1964), diziplina ugari landu ditu eta bere ibilbidean emakumea eta bere egunerokotasuna uztartu ditu, ondorengo belaunaldiei modu esanguratsuan eraginez. Bere ibilbide artistikoa saritu dute 25.000 euroko sariarekin
June Crespo Oiaga (Iruñea, 1982) artista gaztea eta oraindik ezezaguna izanik ere, bere obran irudien erreprodukzioaren erabilera esperimentala burutzeko duen gaitasunak euskal sorkuntza garaikideari ekarpen handia egiten diola azpimarratu du epaimahaiak. 25.000 euro jasoko ditu.
Azkenik, Adelina Moya Valgaño (Kordoba, Espainia, 1944) ikerlariari esker, besteak beste, Nicolas Lekuona, Jose Alemany edota Maria Paz Jimezen obrak ezagutarazi direla baloratu dute. 15.000 euro eskuratuko ditu.
Sariak urriaren amaieran Artiumen bertan egingo den ekitaldi batean jasoko dituzte.
