'Larru marruak'
Album ilustratu peto-peto honek magia egin nahi du, eta lortzen du, xaramelatzen uzteko prest denarekin.
Euskal Herriko Trikitixa elkarteak eragindako emaitza literarioa da, haurrei begira sortua eta ipuingile profesionalen eskuetan eratua. Helburua bi panderojole mitikoren biografia gizarteratzea da, musika tresna honen apologia egitearekin batera. Primi Erostarbe panderojole eta irrintzilaria batetik, eta Maurizia Aldeiturriaga pandero jole eta kantaria bestetik.
Kontakizuna ez da narrazio arrunta, eta zail egiten da ohiko irakur-moldean jarraitzea. Hogeita bederatzi iruditan eskainia, bizpahiru esaldi errimatu bakoitzeko, balada klasikoen (Bereterretxeren kantoria, etab.) antzeko egitura osatzen dute: aurkezpena naturari erreferentzia eginez («Haize hegoa ala zoroa?/ Edozer gauza: egiten du halako beroa!»), in medias res abiatu («Urrunean irrintzi eta orroa./ Maurizia gelan gordea. Primi asto gainean badoa»), eta gertaeren aipamen soltez garatu kontakizuna, irakurleak –entzuleak– osatuko duelakoan. Ez dira falta Mauriziaren kanten aipuak testua osatzean.
Amaieran panderoari buruzko azalpenak daude, QR eta guzti.