Zarauzko (Gipuzkoa) Putzuzulon grabatua da bideoklipa, «amets fabrikaren eraiste neurtuaren bezperetan», plano sekuentzia bakarrean, eta Anari Alberdiren eta Iker Trebiñoren zuzendaritzapean. Anariren taldeko ohiko kideez gain —Mariano Hurtado (teklatua), Mikel Abrego (bateria), Xabier Olazabal Drake (baxua), Ander Mujika (gitarra) eta Xabi Etxeberri (biola)—, hainbat lagunek parte hartu dute abestiaren grabazioan, koruak eginez; besteak beste, Mursego eta Miren Narbaiza musikariek, Maialen Lujanbio bertsolariak, eta Eider Rodriguez eta Kattalin Miner idazleek.
Vinu, cantares y amor abestia Ramon Bilbao bodegaren enkarguz sortu zuen Vegasek, eta ondoren Canciones populistas diskoan (2015) jaso zuen.
Hurrengo kontzertua irailaren 11n emango du Anarik, Lemoan (Bizkaia), formatu akustikoan, Lemoakustik jaialdiaren barruan. Eneritz Furyak, Abereh, Hartz eta Serge ere bertan izango dira.
