«Letra zainduak» eta «musika dotorea». Horiexek entzuteko aukera izango da gaur bertan Bilbon. Beira taldeak emanaldi bat eskainiko du Arriaga antzokiko Foyer aretoan, 19:30ean. Bertan, taldearen beraren abestiak joko dituzte; tartean, baita Xabier Leteren bertsio bat ere, besteak beste. Arriaga antzokiak eta Bilboko Udalak antolatu dute kontzertua, Literatura eta Musika Euskaraz zikloaren harira. Sarrerak salgai daude antzokiaren webgunean eta bertako leihatiletan.
2006an sortu zuten Jon Martin bertsolariak eta Igor Arruabarrena gitarristak Beira proiektua. Egun, beste lau kide dira taldean: Irati Odriozola (ahotsa), Urtzi Olaziregi (baxua), Mikel Arruabarrena (bateria) eta Gari Amondarain (gitarra). Hasieran, musikatutako bertsoak sortzeko proiektu gisa jaio zen. Hortik, pop-rock estiloarekin nahastu zuten bertsogintza. Sortu eta zazpi urte geroago kaleratu zuten lehen lana, eta gaurdaino hiru disko kaleratu dituzte: Dena ez denean ezer (2013), Margotu berria (2016) eta Braillean (2017).
