Biharko telebista osatzen ari direnen merkatua ere bada FIPA

Zinema geletatik kanpo, FIPA jaialdiak badu besterik, non publikorik ez den sartzen, baina profesional andana bat ibiltzen baita. FIPAtel deitu gela dago, adibidez, dena ordenagailuz betea eta ordenagailu bakoitzean ehunka film, FIPAko selekzioaz gain. Horien begirale, telebistetako hainbat ordezkari, lanen erostera etorriak.

Bururatuak ez diren lanek ere leku bat aurkitu dezakete Club FIPAn. Goizetik, kafe eta croissant artean; geroago, arno zuri eta pintxoak lagun, egile eta erosleak nahasten dira. Lan batzuek finantzatzaileak aurki ditzaten, besteek hedatzaileak, FIPAk akuilatzaile lana egiten du. Eta horien artean aurkitzen da Asier Altuna,Bertsolari filmarekin. Udan bururatzea espero dute. Anartean, Lau Haizetara egitasmoaren haritik, FIPAk gonbidatu du finantzaketa eta hedatzaileak aurkitzen lagundu nahian. Sei bat telebistatako ordezkariekin elkartu ahal izan da horri esker. «Ateak irekitzeko» balio duten hitzorduak dira, Marian Fernandez Pascal produktoreak adierazi duenez. Transakziorik ez da egiten FIPAn normalean, baina lehen kontaktuak bai, geroan gauzatu daitezkeenak, «beste proiektuetarako ere balio dezaketenak», Altunaren ustez. Segur da hitzordu horiek «ezinbestekoak» direla, «bestela nola ohartuko dira finlandiarrak, adibidez, film hau existitzen dela?».