2013an jasotako drama onenaren Emmy saria berriro eskuratu du aurten Breaking Bad telesailak. Astelehenean banatu zituzten sariak, 66. aldiz, Los Angelesen (AEB), eta, Breaking Bad-ekin batera, Modern Family eta Sherlock: His Last Vow izan ziren gaueko protagonistak.
Bryan Cranston drama telesailetako gizonezko aktore onenaren kategorian, Anna Gunn taldeko emakumezko aktore onenarenean eta Aaron Paul taldeko gizonezko aktore onenarenean. Horiek dira Breaking Bad-ek eskuratutako sariak, besteak beste. Laugarren Emmy-a du Cranstonek. Bestalde, Julianna Marguliesek irabazi du drama telesailetako emakumezko aktore onenaren saria (The Good Wife).
Umore telesailetan, Modern Family-k lortu du telesail onenaren saria, bosgarrenez. Taldeko gizonezko aktore onenaren saria (Ty Burrell) eta zuzendari onenarena ere (Gail Mancuso) eskuratu ditu telesail horrek.
Abuztuaren 16an banatutako sari teknikoak aintzat hartuta, Sherlock: His Last Vow izan da sari gehien bildu duen telesaila —zazpi jaso ditu; bart, hiru—. Breaking Bad-ek, berriz, sei lortu ditu guztira. Hemeretzi sari jaso zitzakeen Game of Thrones-ek, baina lau sari tekniko eskuratu ditu.
