Donostia Kultura antolatzen du, eta aurtengoan, Liburuzainen elkartearekin eta DSS2016EU hiriburutzarekin lortutako lankidetzari esker, Liburu Lurraldea programa sortu dute, liburu dendek topaketa eta elkarrizketarako gune gisa duten gaitasunari indarra emateko.
Hiri osoan garatuko dute Literaktum, eta egitarau zabala izango du. Marka bihurtu nahi dituzten gaien bidez sailkatu dituzte jarduerak: Ibilbideak, Erronka, Irakurgunea, Literaturaetagehiago, Natura poetikoa, Liburu Lurraldea, Literaktumek aurkezten du, Apaletatik bidaia, Kafea idazleekin eta Ametsekin jolasean. Honela, adibidez, Ibilbideak izeneko atalean, Almudena Grandes eta Maria Dueñas idazleekin solasteko aukera egongo da; Erronka-n egun eztabaidagai diren auziak landuko dituzte, hainbat idazle eta intelektualen eskutik; Irakurgunea Alderdi Ederreko parkean egongo den karpan ezarriko dute, eta solasaldi eta irakurketa kluben bidez dinamizatuko dute.
Liburu Lurraldea-n liburu dendek topaketa eta elkarrizketarako duten gaitasuna indartu nahi dute: "Liburu dendak ezinbesteko guneak dira kultur bizitzan, leku dinamiko eta irekiak; askatasun tarte bat eskaintzen dute elkarrizketarako, aurkikuntzarako eta gogoetarako", azpimarratu dute Donostia Kulturakoak, gaur goizean egindako aurkezpenean.
Kafea idazleekin programan, esaterako, irakurle taldetxo batek aukera izango du Maria Dueñas eta Harkaitz Cano idazleekin hitz egiteko, liburu denda batean kafea hartu bitartean.
Literaktumen, gainera, Ramon Saizarbitoria, Unai Elorriaga eta beste hainbat idazlek parte hartuko dute.
