Hirugarren hamarkadari gogotsu ekin dio Euskal Herria Zuzenean Festibalak. Iaz hartu zuen bihurgune artistikoa “arrakastatsua” izan zela erran dute antolatzaileek eta “EHZ luzera begira pentsatzeko parada”. Burujabetza izanen da Festibalaren ardatza hurrengo urteetan, “burujabe, zapalkuntzarik gabeko Euskal Herri aske bat amesten dugulako. Burujabe, askapen soziala ardatz: sorkuntzarako, gogoetarako eta ekintza sozialerako gunea da EHZ”
Sorgin zelaian gurea asma lelopean hiru eguneko egitaraua prestatu dute aurten ere. Musika mailan, Willis Drumond talde lapurtarraren itzulera da deigarriena. EHZn emanen du lehen kontzertua, ondoren Euskal Herritik beste gutxi batzuk eskaintzeko. Baina ez da talde nagusi bakarra izanen. Crystal Fighters, Fermin Muguruza, Nekka, Belako… anitz dira aurten ere Garroko taula gainean agertuko diren taldeak.
Programazio osoa: http://www.ehz-festibala.eu/eu/
