Duela 150 urte jaio zen Pepe Artola idazle umoretsua

Pepe Artola idazle donostiarra (1864-1929) jaio zenetik 150 urte izango dira bihar, urtarrilak 4. Umore handiko bertsoak eta antzerki lanak idazteagatik nabarmendu zen batik bat. Lanbidez etxe apaintzailea zen, baina kulturarako zaletasun eta pasio handikoa. 18 urte zituela hasi zen askotariko idazlanak argitaratzen: ipuinak, bertsoak, antzerkia… Aktore lanetan ere aritu zen, Marzelino Soroarekin hasita, eta kantari ere bai, Orfeoi Donostiarrean. Garai hartako musikariei lagundu zien letrak idazten, Jose Maria Usandizagari adibidez, Mendi-mendiyan opera ezagunean.

Bizi zelarik, zortzi antzerki obra eman zituen argitara: Legorreko arrantzalia (1898), Bixente (1901), Praishku (1902), Sabiroya (1903), Pello Kirten (1906), Joxepa eta Bittori (1909), Mocha erriyan (1923) eta Mari Iñaxi nerea (1921). Haren bertsoak Auspoa bilduman argitaratuta daude, bi liburutan: Ustez laguna detan eta beste bertso asko (1961) eta Ustez laguna detan (2006). Artolaren lanak irakurgai daude www.euskaraz.net webgunean eta Bertso eta Olerkien Hemeroteka atarietan. Emeterio Arresek Aiton baten eriotza bakarrizketa eskaini zion 1898an.