Belaunaldi berriak sortzeko "tresna" bezala definitzen duen proiektu proposamen berria aurkeztu du goiz honetan EHZ jaialdiaren geroa bere gain hartu duen lan talde berriak, —60 bat lagunek— Baionako Zizpa gaztetxean. Eta horren alde egin du gehiego nagusiak. Hortaz, orain, bost hilabete gelditzen zaizkie paperean dagoen hori konkretuki gauzatzeko.
Gidaritza taldeak aurkeztu proiektuak dioenez, EHZk "borroka eremua indartuko duen tresna izan behar du eragile eta elkarte ezberdinetan ari diren gazteentzat". EHZren "eskaintza politikoa gazte eta herri mugimenduen beharren araberakoa" ikusten du. Argi utziz, "EHZk ez du zama izan behar".
"Hegemonikoa den kulturaz besteko" proposamenak
EHZk bultzatu beharreko kultur ereduari dagokionez, "hegemonikoa den kulturaz besteko proposamenak aintzat hartu eta bultzada" emateko asmoekin daude. "Bertako kultura herrikoaren aldeko apustua" egin nahi dute gazteek bereziki, "gure proiektuaren baloreekin bat egiten duten artistak lehenetsiz". EHZko kultur eskaintza "proiektuaren parte izan nahi duten artistekin elkarlanean osatuko da". Kultur eskaintza eta eduki politikoaren artean "zubiak" eraikitzen saiatuko direla esplikatu dute.
Kontzertuak, publikoa "eduki politikora eta kultur-eskaintza alternatibora hurbiltzeko pizgarri bezala" ikusten dituzte.
Oraino badela zer zehaztu, hori ere nabarmendu da goizeko bilkuran. Eta funtsean, bilkuran berean hasi dira lan taldeak antolatzen, gaiak eta egituraketa zehazten joateko. Aurrekontua ez da oraino arras definitua, ez eta lekua atzemana. Halere, proiektu berria herri batera ekartzeko parioa egin nahi dute. Herriak eskaintzen ahal lituzkeen gune ezberdinak erabiliz.
Horiek erranik, jadanik finkatua dutena jaialdiaren egutegia da. Ekainaren 28, 29 eta 30a. Lehen egunean, "ilusioa transmititu" eta kontzertuak antolatzea aurreikusten dute. Bigarren egunean, larunbatarekin, goizetik tailerrak, "eduki politikoa lantzeko" eta kultur eskaintzak. Gauean, berriz, ekitaldia eta berriz ere kontzertuak.
Eta iganderako herri bazkaria pentsatua dute, familiak erakartzeko asmoz, belaunaldien arteko nahasketa bultzatuz.