Elias Kerejeta zinema ekoizlea atzo goizean hil zen, Madrilen, 78 urte zituela. Hernanikoa zen sortzez, eta Realean aritu zen 1952 eta 1958 artean, baina kirol profesionala utzi eta zinemagintzan hasi zen.
1963an, bere ekoizpen etxea sortu zuen, Querejeta PC, eta 50 film baino gehiago egin zituen. Arrakasta izan zuten horietako batzuek, El espíritu de la colmena (1973) eta Los lunes al sol (2002) pelikulek esaterako.
Dozenaka sari irabazi zituzten Kerejetak eta hark egindako hainbat filmek. Esaterako, Donostiako Zinemaldiko Urrezko Maskorra eskuratu zuen El espíritu de la colmena-rekin, eta Espainiako zinemagintzako film onenaren Goya saria Los lunes al sol-i esker.
Madrilen gordeko dituzte haren errautsak.
