'Estepako otsoa'

Zuzenean aurkeztu ondoren, sarean entzungai dago Hostoak taldearen Estepako Otsoa lehendabiziko diskoa. Olmo Cascallar lezoarraren proiektu pertsonalak, bestelako norabidea hartu du. Hain zuzen ere, doinu gogorrak albo batera utzi ditu, ez erabat, esperimentazioaren bidetik helmuga berrietara iristeko. Oiartzualdeko musikariak ditu bidelagun, besteak beste, Gamora, Yelow Page eta Desoreka taldeetan ibilitakoak. Boskote moduan desertuan barneratu dira otsoaren bila. Baita aurkitu ere, psikodeliaren laguntzarekin. The fate of The Steppenwolf eta Estepako otsoaren gainean erakustaldia izenburuek argi diote. Hard rock zein heavy zaporea dute Harry Haller-en oharkizunak eta Kill for Love Iommi zaleak. Ehizatzeko, hobe Labana stoner bizia, eta, amesteko, The magic theater kontakizun progresiboa. Euskara eta ingelesa tartekatuz, Ekaitzen eta Olmoren ahotsak trukatuz, emaitza paregabea lortu dute. Zein ederra den musikariek barnean daramatena azaleratzen ikustea eta entzutea.