Etxea helmuga

A
Malaga, Lekeitio,
Salou, Kroazia...
eguneroko estresa
geldiarazia.
Hartu kulero batzuk,
krema, orrazia...
txoko bat bihur dadin
gure oasia.

B
Udan eraldatzen da
herria asteka:
astelehenak zapatu,
eguenak domeka.
Kaleak garbituta
ta lorez beteta,
beste behin bisitariz
beteko da eta.

A
Bizitza bilakatzen
da ustekabean
gauak kaña artean
ta goizak harean.
Merezi du ordaintzea
—fijatu marean!—
kafe bat hiru euro
itsaso parean.

B
Neure etxean arrotz
sentitzea dana,
jendea, erritmoa,
kaleko jarana...
ez da bateragarri
zazpietan lana.
Gauero hamarretan
ixten dut pertsiana.

A
Gauero kontzertuak
daude zuzenean,
tabernetan turista-
-filak barrenean;
herritarrak guri esker
dabiltza lanean!
Zer egiten da hemen
gu ez gaudenean?

B
Irailean, beroa
lurruntzen hasia,
berreskuratzen dugu
itsaso gazia.
Bukatzean zikloa
ta lo eskasia
negua bihurtzen da
gure oasia.

Doinua: Galerianoarena.