Euskal harria eta autobiografia dira Euskaltzaindiak argitaratatzen duen Erlea aldizkariaren seigarren alearen ardatza. Harria, euskal harriaren ideia eta kontzeptuari beste buelta bat eman nahi izan zaio ale honetan, eta honen inguruko idatzi ezberdinak daude. Bestalde, autobiografia genero literario bezala "gutxietsia" dagoela uste du Atxagak.
Hori dela eta, hainbat kolaboratzaileri beraien bizitzako pasarteak idazteko eskatu zaie Erlea-ren seigarren alerako. Besteak beste, ale honetan Mariasun Landa, Arantxa Urretabizkaia, Eider Rodriguez, Maialen Lujanbio, Uxue Apaolaza, Lander Garro eta Joxemari Iturralderen idatziak aurki daitezke.
Jorge Luis Borgesi buruzko Atxagaren artikulu batek zabaltzen du aldizkaria. Izan ere, Borgesen argitaratu gabeko lau hitzalditako audioak iritsi dira bere eskutara. Borges euskal kulturaren "antipodetan" kokatu du Atxagak, eta "paradoxikotzat" eta "justizia poetikotzat" jo du hauek edukitzea. Aipatu testuez gain, elkarrizketak, poemak, ipuin laburrak eta artikuluak ere badira Erlea-ren ale berrian.
