Estitxu Garai Artetxe, Lander Garro, Gaizka Aranguren eta Josu Amezaga aritu dira solasean mahai inguruan, arratsaldean. Goizetik aritu dira, ordea, komunikazioaren alorra lantzen, eta hamabi hedabidetako ordezkariak aritu dira beren ponentziak aurkezten. Mikel Lizarralde kazetaria egiten ari da jarraipena:
Bilbo Hiria irratiko Ane Zabalak nabarmendu du euskal kultura estrategiarik ez dagoela, eta Argia aldizkariko Gorka Bereziartuak, berriz, "bigarren mailako hizkuntza" dela euskara. Alea aldizkariko Aritz Martinez de Lunak, berriz, azpimarratu du beharrezkoa dela "lurralde osoan komunitate bat sortzea", eta helburuak konpartitzeko beharraz jardun du Igor Elortzak (Di-da).
Gara egunkariko Xole Aramendik, berriz, bereizi egin ditu "kultura ofiziala eta herri kultura", eta uste du hedabideen zeregina dela "hausnarketa piztea eta sortzea".
