Eusko Jaurlaritzak Filmazpit egitasmoa abiatu du, euskarazko azpitituluak dituzten jatorrizko bertsio originaleko filmak bultzatzeko. Donostia Kulturak kudeatuko du eta dagoeneko banaketa eskubideak hartuta dituen filmekin eta sarbidea libre duen datu base batekin egingo dute. Tabakalerak, Euskal Filmotekak eta Donostiako Zinemaldiak parte hartuko dute.
Filmazpit.eu webgunean kudeatuko dute, eta bi atal izango ditu. Lehenengoan filmak eskegiko dituzte: bost film luze eta zazpi laburrek osatuko dute hasiera batean. Bigarren atalean, berriz, azpitituluak jasoko dituzte, erabiltzaileek doan jaitsi ahal izan ditzaten saretik. Aurten 123.000 euroko aurrekontua izango du.
