Gonzalo Rubalcaba eta Al Di Meola jazz jaialdian izango dira Getxon

Getxoko Nazioarteko Jazz jaialdiaren arduradunek aurten parte hartuko duten beste bi izen jakinarazi dituzte: Al Di Meola gitarrista eta Gonzalo Rubalcaba piano jotzailea. Eurekin batera Wynton Marsalis, Ignacio Berroa eta Stacey Kent izango dira jaialdiko kartelburuak.

Di Meola (Jersey City, AEB, 1954) Chick Corea eta Stanley Clarkeren orkestran hasi zen jotzen 70eko hamarkadan. Gero jazz-rocka egiten zuten hainbat musikarirekin jotzen aritu zen, hala nola Jan Hammer, Steve Winwood, Jaco Pastorius eta Mingo Lewisekin. 80ko hamarkadan hirukotea osatu zuen Paco de Lucia eta John McLaughlin gitarristekin, eta 90ekoan Stanley Clarke baxu jotzailearekin eta Jean-Luc Ponty biolin jotzailearekin jardun zuen.

Rubalcaba (Habana, Kuba, 1963) bere herrialdeko jazz musikari ezagunenetarikoa da. 80ko hamarkadan Orquesta Aragonekin hasi zen jotzen, eta 1987an bakarkako lehen lana argitaratu zuen, Mi Gran Pasión. Disko horri esker kontratua sinatu zuen Blue Note zigiluarekin, eta Inner Voyage bere disko ezagunena argitaratu zuen 1999an.

Algortako Bihotz Alaiplazan egingo den jaialdirako sarrerak apirilaren 8an jarriko dira salgai.