Donostiako Viktoria Eugenia antzokiak Dantzaren Nazioarteko Eguneko XXVIII. gala hartuko du gaur. Gipuzkoako Dantza Profesionalen Elkarteak 1997tik antolatzen du ekitaldi hori, eta, urtero bezala, dantza estilo ugari erakusteaz gain, bertako dantzari eta konpainien lana nabarmenduko du aurten ere. Elkarteak, halaber, Gorka Duran dantzaria eta Alberto Sagardia pianista sarituko ditu ekitaldian.
Donostia Kulturarekin elkarlanean antolatu dute gala, eta, beste urte batez, bi saio izango dira: 12:00etan bata eta 19:00etan bestea. Besteak beste, honako hauek parte hartuko dute aurten: Jon Agirretxek, Cristina Casak, Alejandro Polok, Gaizka Moralesek, Mikel Aranak eta Uikan Dantza konpainiak, baita Madrilgo Dantza Profesionaleko Mariemma Errege Kontserbatorioak ere.
Galan bertan jasoko dituzte sariak Duranek eta Sagardiak. Dantzari hasiberri onenaren aitortza emango diote Durani; Oinkari dantza taldean hasi zuen ibilbidea, hainbat eskola eta taldetan trebatu zen gero, eta Alemanian dabil iaztik, Wiesbadeneko Hessisches Staatsballett konpainian. Sagardiari, berriz, aipamen berezia egingo diote, pianista gisa dantzarien laguntzaile lanetan urte luzez egindako ibilbideagatik.
Galak emango dio amaiera Dantzaren Egunaren harira Donostian antolatutako ekitaldi sortari, zeinak apirilaren lehen asteburuan hasi ziren. Dantza Kalean ekitaldiaren XVII. aldia egin zuten orduan; hamahiru eskolatako ia 300 dantzarik parte hartu zuten, eta askotariko dantza estiloak erakutsi zituzten kaleetan.
