Bakarkako lehen lana aurkeztu eta astebetera iragarri ditu lehen kontzertuak Gorka Urbizuk (Lekunberri, Nafarroa, 1977). Donostian emango du lehena, Intxaurrondoko Kultur Elkartean, otsailaren 23an. Hortik aurrera beste zortzi kontzertu ere eskainiko ditu, horietatik zazpi Euskal Herrian, beste bat Madrilen, eta beste bat Bartzelonan.
Otsailean, Donostian ez ezik, Bilbon eta Gasteizen ere entzun ahal izango dira Lekunberrikoaren Hasiera bat diskoko abestiak: hilaren 28an, Gaztea sarietan joko du, Bizkaiko hiriburuan, eta 29an Gasteizen, Kubik aretoan. Apirilean helduko da hurrengo aukera: hilaren 12an, Iruñeko Zentral aretoan joko du; 19an, Madrilgo Joy Eslavan; eta 27an Bilbora itzuliko da, Kafe Antzokira.
Maiatzaren 18an, berriz, Miarritzeko Atabal aretoan izango da entzungai, eta hilaren 25ean, Bartzelonan, Parallel 62 aretoan.
Ekainerako iragarri du azken kontzertua: oraingoz, hilaren 7an izango da, Azpeitiko Sanagustin kulturgunean.
Sarrerak asteazken eguerditik aurrera erosi ahal izango dira, Gorkaurbizu.eus webgunean.
TOUR BAT 2024
— gorkaurbizubat (@gorkaurbizubat) January 22, 2024
👉 Sarrerak asteazkenean (urtarrilak 24), eguerdiko 12:00etan salgai https://t.co/3cJbstrC8V webgunean
(Diseinua: Ander X. Tejadas)#hasierabat#tourbat#gorkaurbizupic.twitter.com/J1HCgY4gRC
Berri Txarrak taldeak 2019an ibilbidea bukatuta ere, doinu berrien bila aritu da musikaria urteotan, eta franko aurkitu ditu azkenerako. Horietako hamar jaso ditu bilduma batean, eta bakarkako lehenbiziko diskoa plazaratu du hala: Hasiera bat. Entzun hemen.
Zerrenda moduko bat osatzen dute Urbizuk argitaraturiko hamar kantuek: Maitasun bat, Teoria bat, Tren bat, Toki bat, Janela bat, Kolore bat, Lilura bat, Etxe bat, Sute bat eta Besterik ez. Pieza horietan guztietan, doinu aski biluziak bistaratu ditu musikariak. Soinu geruza gutxi metatu ditu abestietan; kontrara, «gordin» utzi ditu, oro har. Kantuak «erantzi, hustu eta kimatu», horien muinak agerian uzteko saiakera betean, diskoarekin batera argitaratutako oharrean idatzi dutenez. «Soiltasunaren ederra lortzen ahaleginduz, sortuko denaren beldurrik gabe».
