Bere 15. urteurrena ospatzeko egitarau berezia izango du Guggenheim Bilbao museoak. Juan Ignacio Bidarte museoko zuzendariak azaldu duenez, askotariko ospakizuna egingo dute: arte plastikoak, musika, dantza, moda, arkitektura, gastronomia eta arte eszenikoetako ekintzak izango dituzte urtean zehar. Bidarte oso pozik agertu da museoaren ibilbidearekin eta, orotara, “oso balantze positiboa” egin du.
Ispilua alderantziz MACBA eta Caixa fundazioetako bildumen erakusketak inauguratuko du urteko programazioa, datorren asteartean. Gero David Hockney, Claes Oldenburg, Egon Schiele eta Cristina Garcia Roderoren erakusketak ikusteko aukera egongo da. 15. urteurrenean euskal artista gazteei beraien lana erakusteko aukera eman nahian, Guggenheim Bilbao Horma lehiaketa antolatuko dute, eta proiektu irabazlea martxotik abendura bitartean ikusgai izango da museoko gela batean.
Publiko guztietarako ekitaldiak prestatu dituzte, Bidarteren arabera: arkitektura sinposioa, museoko erraietatik bisita gidatuak, Artearen II. Pedagogiak zikloa, IPADen sortzeko ikastaro bereziak eta argazki lehiaketak, beste askoren artean. Zuzendariak azaldu duenez, hori egingo denaren aurrerapen bat baino ez da eta 2012an zehar ekitaldiak gehitzen joango dira. Jeff Koonsen Puppy eskultura ere ospakizunetara batuko da udaberritik aurrera, Koonsek lore-soineko berezia diseinatuko baitio.
Ekitaldietan parte hartuko dute, kasu: Josean Alija eta Ferran Adria sukaldariek, Ainhoa Arteta sopranoak, Bilbao Orkestra Sinfonikoak, Esemble Kuraiak eta New York City balletak.
Guggenheimen arabera, iaz ia-ia milioi bat bisitari izan zituen Bilboko museoak. 1997ko urriaren 18an zabaldu zuten.
