Israelek 'persona non grata' izendatu du Gunter Grass idazlea

Was gesagt werden muss (Esan behar dena) poesia kaleratu zuen Gunter Grass idazle alemaniarrak joan den astean. Eta horko lerro batzuek hautsak harrotu dituzte. Izan ere, 1999ko Nobel saridunak esan du Israelen potentzia nuklearra mehatxu bat dela, «berez hauskorra den munduko bakearentzat». Hori dela eta, Israelek persona non grata izendatu zuen herenegun idazle alemaniarra. «Grassen poemek Israelen eta israeldarren kontrako gorrotoaren sugarrak elikatzen dituzte», adierazi zuen Eli Yishaik, Israelgo Barne ministroak. Erabakiaren inguruan aldeko zein kontrako iritziak azaldu dira, bai Israelen eta baita Alemanian ere.