Jasone Osoro da Euskal Idazleen Elkartearen zuzendari berria. 2010eko otsailean aukeraturiko Ander Iturriotzen lekua hartuko du. Osorok Joxemari Karrere, Pako Aristi, Cristina Lasa, Josune Muñoz, Asier Serrano eta Jon Martin izango ditu bidelagun, elkarteak jakinarazi duenez. Duela bi urte berarekin batera Zuzendaritza Batzordean hasitako kide gehienek jarraituko dute taldean, eta hori dela-eta onartu du postua. Osorok baieztatu du "borondatea eta ahalegina" jarriko dutela datozen lau urteotan.
Osoro (Elgoibar, 1971) idazle profesionala da. Informazio Zientzietan lizentziaduna izanik, kazetari lanetan aritu izan da hainbat urtez. Telebistan ere aritu izan da, aurkezle zein gidoilari, eta urteak daramatza egunkari eta aldizkarietan zutabeak idazten. Lehen literatura lana 1998an kaleratu zuen, Tentazioak, eta Bi marra arrosa (2009) du azken lana.
Tentazioak ipuin liburuak Bilboko Liburu Azokako Zazpi Kale saria jaso zuen, liburuaren egunean gehien saldu zen euskarazko argitalpena izateagatik. 2000. urtean Igartza Bekarako akzesit bat lortu zuen. Beka horri esker, Korapiloak narrazio laburren eta poemen liburua argitaratu ahal izan zuen. Lan horrek Zilarrezko Euskadi saria eman zion.
2001ean egin zituen lehen urratsak gazte literaturan, Jara nerabearen abenturei buruzko liburuarekin. Gerora Jara, bikiak eta bikoteak eta Jara Bartzelonan plazaratu zituen, eta 2009an sortu zen Ezekiel, gazteentzat Osorok asmaturiko pertsonaje berria. Jararen eta Ezekielen abenturak behin baino gehiagotan gailendu izan dira Juul sarietan.
2002an, Gipuzkoako Foru Aldundiak emandako beka baten laguntzaz, Bartzelonara joan eta zinema gidoigintzari buruzko graduostekoa egin zuen. Horren emaitza izan zen 2003an kaleratutako Greta, Osororen lehen eleberria. 2009an aurkeztu zuen Bi marra arrosa liburuan, bere lehen haurdunaldiari buruzko kronika egiten du. Eta, horiez gain, hiru ipuin bildumatan hartu du parte: Gutiziak (Txalaparta); Euskal idazleen ipuin erotikoak (Txalaparta); eta, azkenik, Bakarrizketan (Alberdania).
