Gaur aurkeztu du Mikel Urdangarinek bere lehendabiziko zuzenekoa, Bilboko Kafe Antzokian. Bertan jaio zen azkeneko diska hau orain urtebete eskas. 2010eko abenduaren 30ean; 600 lagunek goraino bete zuten Bilboko Kafe Antzokia.
Duela hamabost urtetik hona Euskal Herriko folklorea marrazten aritu da Urdangarin eta ilusioz aurkeztu du proiektu berri hau. Aspalditik omen zuen zuzeneko diska bat egiteko gogoa eta pozik dago lortutako emaitzarekin: Hogeita zortzi musika-lan eta bi ordutik gorako CD bikoitza. Bingen Mendizabalak, Nika Bitchiasvilik, Rafa Ruedak, Sahiela Gazmaierek, Koldo Uriartek eta gonbidatu berezi gisa, Josu Zabalak euren ukitua eman diote diskari.
“Zuzenean 2010.12.30” diskan Urdangarinek hainbat abestiren errepasoa egiten du; "etxeko leihotik apaltzen ari den eguzkiarekin batera sortuak gehienak". Ostegun gau hartako kontzertuaren esentzia da diska; hasperenetik aztoramendura, melankoliatik menderatu guztien irribarre leun eta konplizera, Auñamendiko basoetatik “Wonderful life” lanaren bertsio koloristara (Black musikari britainiarraren 87. urteko arrakasta), Lekandako 1.300 metroetatik Kafe Antzokiaren 25 metroetara... gau hartan sentimendu denak bat ziren eta lanak halaxe jaso du.
