Esther Ferrer artista, Anjel Lertxundi idazlea eta Jone San Martin dantzari eta koreografoa gonbidatu ditu Donostia 2016k Karta Zuriak ekimenaren barruan. Bakoitza bere ibilbide profesionalean oinarrituta, eta Donostiako 2016ko kultur hiriburutzaren balioak aintzat hartuta, hiru sortzaileek kultur ekimenerako proposamenak egin dituzte, 2016an Donostian gauzatzekoak denak ere, eta Donostia 2016k jarriko ditu bitartekoak proposamen horiek garatu eta gauzatzeko.
William Forsythe koreografiaren konpainiako kide izan da hogei urte baino gehiagoan Jone San Martin, orain dela gutxi ate, eta haren proposamenaren atal bat William Forsythe Donostiara ekartzea da, berak bere ibilbidean ezagutueta miretsitako beste koreografo batzuekin batera. Horrez gain, emanaldi batean dantza eta bertsolaritza uztartzeko asmoa agertu du.
Anjel Lertxundik hizkuntza hegemonikoetan idazten dute bost idazle hizkuntza gutxitu batean idaztearen inguruko gogoeta egitera bultzatu nahi ditu, gero idazle horiek 2016ko azaroan Donostiara etor daitezen gogoeta horien berri ematera, hitzaldi eta mahai-inguruen bidez. Idazle horiek idatzitako testuak, euskarara itzulita, jasoko lituzkeen liburu bat argitaratzeko proposamena ere bildu du Lertxundik bere karta zurian. Honako hizkuntza hauetan aritzen dira Lertxundiren proposamena jaso duten bost idazleek: ingelesa, alemana, frantsesa, italiera eta espainiera. Haien izenik ez du eman, ordea, behin betiko baiezkoak jaso arte itxoitea hobetsi baitu.
Esther Ferrerrek hiru performance proposatu ditu, hiriari eta bereziki hiriaren periferiari protagonismoari eman nahian eta “herritarren borondatezko parte hartzea” bilatu nahian: Os voy a contar mi vida, Se hace camino al andar eta La marcha de la poesía. Lehenengoan zeinuen hizkuntza erabiliko dute parte hartzaile batzuek; bigarrengoan, hiriko periferiak "arrastoa" utziko du erdigunean; eta hirugarrengoan poesia zabalduko da hirian zehar modu ezohikoetan.
