Kimuak katalogoko film laburrek 800 jaialditan parte hartuko dute

Kimuak 2010 katalogoko bederatzi film laburrak 800 zinema jaialditara bidaliko dituzte Eusko Jaurlaritzako Kultura Sailak eta Euskal Filmategiak. Inoiz baino film labur gehiago aurkeztu dira Kimuak katalogorako hautaketaren azken deialdira, 72 guztira, eta bederatzi izan dira aukeratuak, aurreko ekitaldietan baino bat gehiago. Ekoizpenaren hazkundeak eta «batez besteko maila urtetik urtera hobea izateak» bultzatu dute epaimahaia katalogoan film bat gehiago sartzera, Txema Muñoz Kimuak katalogoaren koordinatzaileak azaldu duenez.

Katalogoko lanen kalitatearen frogatzat jo ditu Muñozek horietako batzuek jasotako sariak. Isabel Hergueraren Ámár Espainiako animazioko film laburrik onena izendatu dute, adibidez, Madrilgo Animadrid 2010 jaialdian. Hauek dira beste zortzi lanak: Asier Altunaren Artalde, Angel Aldarondoren Ondar ahoak,Alaitz Arenzana eta Maria Ibarretxeren Exhibition 19, Kote Camachoren La gran carrera, Miguel Angel Jimenezen Khorosho (Todo bien), Elias Leon Siminianiren El premio, Enrique Garcia eta Ruben Salazarren Daisy Cutter. La cortadora de margaritas eta Borja Kobeagaren Un novio de mierda.