Kobetamendi, euskal kulturaren birika bihurtuta

Zirrara ez zen gauerdian piztu. Arratsaldetik nabari zen egun berezietarako gordea dagoen sugar hori. Zaleek ondo ulertu zuten Berri Txarrak-en helburua, eta guneak ateak ireki zituenetik ibili zen jende mordoa. Eskaintza aberatsa prestatu zuten antolatzaileek, eta sortzaile guztiek izan zuten ikus-entzuleen arreta: Ahotsenean jo zuten zortzi musika taldeek, antzezleek, dantzariek eta bertsolariek. Euskal kulturaren birika izan zen Kobetamendi herenegun, aurreko hiru egunetan makrojaialdi hedonista ospatu zen gune bera.