Ben LaMar Gay
'Yowzers'
Diskoetxea: International Anthem.
Chicago hiriko jazz musikaria xaman moduan azaltzen da hirugarren lan luze honetan. Horren adierazgarri, grabazio osoan ageri diren erritmo tribalak eta giro espiritualak, blues eta gospel kutsuko aieneak ahaztu gabe. Horretarako, Afrikako instrumentuez eta geruza elektronikoez baliatu da, eta emaitza doinu polimorfoak dira, etengabe mutatzen duten piezak. Ondorioz, tronpetistak orain arte argitaratu duen lanik abstraktuena da, baina, era berean, Afrikara gehien begiratzen duena. Urriaren 18an, Galdakaoko Kaiola festibalean izango da, herrikide eta zigilukide dituen Irreversible Entanglements bandarekin batera.
