'Guerrilla Girls! She-Punks & Beyond 1975-2016'

Martxoaren 8ko bestondoa arintzeko soinu banda aproposa da Ace zigilu prestigiotsuak argitaratu berri duen bilduma hau. Bertan, emakume punk-rock zaleen ahotsak nagusitzen dira: aitzindariak, tartean, Patti Smith, Blondie eta X-Ray Spex —azalean Poly Styrene agertzen da—; post-punk klasikoaren bozeramaileak, The Slits, Au Pairs, The Raincoats...; 90eko urteetako Riot Grrrl mugimenduaren ordezkariak, Huggy Bear, Bikini Kill eta Bratmobile; eta, azkenik, emakume garaikideen oihuak, The Tuts, The Regrettes eta Skinny Girl Diet. Ildo berean, oso gomendarria da Revenge Of The She-Punks bilduma (2022), zeina Vivien Goldmanek idatzitako izenburu bereko liburuan oinarritzen den. Neskak aurrean.