Legea urratuz hautatu zuen Maiak Gaiarre antzokiko kudeatzailea

2011ko abuztuan, Iruñeko Gaiarre antzokiko patronatuko batzarrak Jose Maria Asin hautatu zuen antzokiko kudeatzaile izateko. Enrique Maia Iruñeko alkateak ez zuen begi onez ikusi izendapena, eta ez zuen onartu. Asinen ordez, Teresa Lasheras jarri zuen behin-behineko kudeatzaile gisa, harik eta urtarrilean patronatuak Gregorio Navarro izendatu zuen arte. Alkateak legea urratu zuela erabaki du orain Nafarroako Administrazioarekiko Auzietako Auzitegiak.

Auzitegiaren arabera, bere postuari ez zegokion ardura hartu zuen Maiak Asinen izendapena atzera botata. Izan ere, dioenez, udala ez beste erakunde bat da antzokiarena, eta bere lege propioak ditu.«Jatorri zibilekoa da, eta ez administratibokoa». Gaiarre Fundazioak izaera juridiko propioa duela eta bere gisa jokatzeko ahalmen juridikoa duela ere esaten du erabakiak.

Alkateak dio erabakiaren aurkako helegitea aurkezteko aukera aztertzen ari dela.