Mekons & Robbie Fulks

Diskoetxea: Bloodshot Records.

Beterano izaten hasteko bidean dabil Robbie Fulks kantautore estatubatuarra (52 urte, 13 disko), eta zer hobe horrelako lan batekin ospatzea baino. Kasik belaunaldi-kide dituen The Mekons folk-rock-punk talde estimatuarekin bolada bat eman Eskoziako irla galdu batean, eta, tartean, kantu bilduma hau ondu. Countrya, folka, rocka eta punk joskerak, egileen prisma kritikotik ikusiak, erabat akustikoa den lan baterako. Gitarra akustikoak, biolinak eta eskusoinuak dira nagusi, Fulksen, Sally Timminsen eta Jhon Langforden ahotsekin batera. Lagun kuadrilla bat musikarekin disfrutatzen, horixe da transmititzen duen sentsazio nagusia, eta emaitza ikusita, badirudi erabat osagarriak direla bataren eta besteen bideak, elkarrekin aritzea munduko gauzarik naturalena balitz bezala. Gozagarria.