Odei Barroso izan da bigarren Lapurdi, Zuberoa eta Nafarroa Behereko Bertsolari Txapelketan; lehenaren eta bigarrenaren artean puntu alde nabarmena izan da, eta jardunean ere nabaritu da hori: gainontzekoen gainetik kantatu du ariketaz ariketa Sustrai Colinak. Barrosoren, Xumai Muruaren, Maddi Sarasuaren, Ortzi Idoateren eta Xan Alkhaten jardunean zuzenetik joan dira bertsorik finenak, jardun nahasian. Hala, Sustrai Colina azaroaren 15eko finalean izango da.
Larresoroko Herriko Gelan (Lapurdi) 250 lagun bildu dira lehen finalerdia bertatik bertara ikusi eta entzuteko. Bertsotan gutxitan jo du goia saioak, eta saioaren parekoa izan da Herriko Gelako giroa bera ere. Maiana Irigoienek aurkeztutako gaietan, bikotekideen ahotik kantatu behar izan dituzte ofizioetako gehienak.
Colinak 331 puntu erdietsi ditu; Barrosok, 296 puntu; Muruak, 294,5; Sarasuak, 285,5; Idoatek, 268; eta Alkhatek, 250,5. Lehen puntua emandako ariketan azken puntuan egin duen joskera akatsa izan du saioko arantza Colinak. Barrosok kartzelan egin du lanik zuzenena. “Aldaketa hori egin duzunetik jende gehiago hurbiltzen zaizu”, eman die gaia Irigoienek, eta honela kantatu du lehena Barrosok bertsoa artez josita: “Banekien nik aldaketa bat / egin behar nuela aurten. / Zer den ederra ingurukoek / nola erraten diguten! / Lehen parrandan ligatu ezin / eta ni barrenak hausten / ene usteak kamusten / aurreiritziak zapuzten. / Ebakuntza bat egin berri dut / sobera nuena husten / baina zergatik oraindik ez naiz / aski ederra ikusten?”. Hautetsiaren ahotik kantatzeko hautua egin du lan bererako Colinak, eta honela borobildu du: “Aurreko hausteskundetan / aurkeztu nintzena brabo / aspaldi honetan nabil / etsiak jota zeharo. / Herritar xume-xume bat / baizik ez nintzen lehenago / ta bozek jarri ninduten / besteak baino gorago. / Baina nazkatuta nago / ezin liteke, akabo / jende gehio hurbiltzen zait / baina lagun guttiago”.
Finala Aiziritzeko finalerdian erabakiko da, datorren igandean. Maddalen Arzallus, Aitor Servier, Eneritz Zabaleta, Ramuntxo Christy, Egoitz Zelaia eta Patxi Iriartek kantatuko dute.
