Udazkena da euskal kulturgintzaren udaberria, eta bideoklip sorta aurkeztu dute asteotan horregatik musika taldeek. Durangoko Azoka gerturatu ahala, beren lan berrien berri ematen hasten dira talde eta diskoetxeak. Herenegun aurreratu zuen, adibidez, Berri Txarrak taldeak azaroan kaleratuko duela bere hurrengo diskoa, eta azokarako izango dituzte prest beren lan berriak Gose taldeak, Hesian-ek, eta Vendettak ere, besteak beste. Disko uztaren aurretik bideoklip uzta heldu da oraingoan.
Keu Agirretxe (Etsaiak, Fjord, Keu...) eta Xabier Iriondo (Afterhours) musikariek KX proiektua osatu dute berriki, eta bidean dute diskoa. Buru handien mendekua kantaren bideoklipa da oraingoz aurkeztu duten aurrerapena. Josu Eizagirrerena da bideoklipa, eta diskoan Kirmen Uribe eta Mikel Etxaburu idazleen laguntza izan dute.
[youtube]http://youtu.be/WhmiL5n508o?list=UUttsXycz07ARrPJwdLEczCg[/youtube]
Iñigo Cabezafuego. Euskal Herriko rock munduan ezaguna da musikari nafarraren ezizena. Atom Rhumba, Half Foot Outside, Bizardunak eta Black Lagun taldeetan aritua da, besteak beste, eta bakarkako bidea hasi du orain. Zortzi abestiko Camina conmigo diskoa kaleratu du (Folc reccords/Happy Place), eta egunotan eman du argitara izen bereko bideoklipa.
[youtube]http://youtu.be/wvMX5CCXUi8[/youtube]
Eratu taldeak iaz kaleratu zuen Ispilu Iluna diskoa; orain egun gutxi plazaratu dute beren azken bideoklipa, ordea: Sustrai sendoak. Aguraingo Herriko tabernaren 30. urteurrenaren harira grabatu dute pieza, eta kolaborazio sorta izan dute abestia osatzeko. Betagarri taldeko Iñaki, Evaristo eta Kaotiko taldeko Jhony ageri dira abesten, eta Oihane Perea eta Iker Pastorrenak dira hitzak.
[youtube]http://youtu.be/KRTJdeaH1Sg[/youtube]
Enkore taldeak single berria aurkeztu du egunotan: Ozen oihukatu abestia, hain zuzen ere. Udaberrian kaleratu zuten berez Kanala diskoa, baina orain eman dute argitara bideoklipa, Hesian taldeko Zuriñe Hidalgo abeslariaren kolaborazioarekin, eta telebista saio ezagun bati parodia umoretsua eginez.
[youtube]http://youtu.be/N-TptzfIcZg[/youtube]
Disko berria amaitzen dabil Vendetta taldea ere, baina oraingoz ez du aurrerapen abestirik aurkeztu. Aurreko diskoan dagoen Botella de ron kantaren bideoklipa aurkeztu zuen uztailean, eta lagun dituzten hainbat talde deitu zituzten kolaboratzeko. Betagarri, La Pulqueria eta Guachupe, adibidez.
[youtube]http://youtu.be/Ll1y6DosNG4[/youtube]
