Gizonezkoen nagusitasuna erabatekoa izan da zientzia fikzio eta fantasiaren arloan, baina leku bat egitea baino gehiago lortu zuen Ursula K. Le Guin idazleak (Berkeley, Kalifornia, AEB, 1929). 2016an, The New York Times-ek esan zuen hura zela AEBetako zientzia fikziozko idazlerik onena. Astelehenean hil zen, 88 urte zituela.
Antropologoak zituen gurasoak, eta gai horri buruzko interesa maiz agertzen da haren liburuetan. Urruneko planetetara joanez, gaur egungo gizarteari, sexualitateari eta erabaki moralei buruz gogoeta eragiteko zuen gaitasuna nabarmendu izan zaio. Feminismoa, anarkismoa, ekologia eta taoismoa ere asko interesatzen zitzaizkion.
Haren lanak 40 hizkuntzatara itzuli dituzte, eta milioika saldu ditu aleak. The Left Hand of Darkness lana (1969), esaterako, 50 urtean baino gehiagoan egon da inprentetan. Hain zuzen, lan hori izan zen gehien famatu zutenetako bat, sari asko jaso baitzituen hari esker. Urtaroaren arabera, emakume edo gizon dira liburu horretako protagonistak. Earthsea seriea ere Le Guinena da.
Nagusiki zientzia fikzioaren arloan aritu arren, poesia, saiakera, ipuin eta haur literaturako liburuak ere idatzi zituen. Esti Ezkerra literatura adituak iruzkina egin zion BERRIAn haren The Ones Who Walk Away from Omelas liburuari.
