Ostegunean, 12:00ak aldera, Eusko Jaurlaritzaren larrialdiak koordinatzeko SOS Deiak zentroak ES-Alert sistemaren eraginkortasuna probatuko du. Larrialdietan edo hondamendietan herritarrei abisuak emateko balio du alerta horrek. Ordu horretan Araban kokatutako gailuek alerta soinu bat igorriko dute, eta ondoren mezu bat jasoko dute, herritarrek proba bat dela jakin dezaten.
Mugikorrean mezu hau jasoko dute:
«112 SOS Deiak Euskadik egindako alerta masiboen aktibazio proba. Larrialdi hondamendi egoeren aurrean herritarrei telefono mugikorretara bidaliko zaien alerta sistemaren proba mezu bat da. Eskerrik asko. Mezua irakurri ondoren, sakatu onartu pantailatik ezabatzeko».
SOS Deiak-en hirugarren simulazioa izango da. 2022an Bilboko auzo batzuetan egin zuten, eta iragan urrian Balmasedan (Bizkaia) ere egin zuten.
