Bi gizon atxilotu zituen atzo Gasteizko Udaltzaingoak, indarkeria matxista leporatuta. Horietako bat, 22 urtekoa, eguerdian atxilo eraman zuten agenteek, bikotekidearekin izandako liskar batean hari eraso egitea egotzita. Udaltzainen arabera, bikotekideek «elkarri eraso egin zioten bien haurra aurrean zela», eta horregatik atxilotu zuten gizona. Emakumea, berriz, ikerketapean jarri dute gertaera horiengatik.
Zabalgana auzoan atzeman zuten poliziek beste gizona, 37 urtekoa, bikotekide ohiarengandik eta bien seme-alabengandik urruntzeko agindua hausteagatik. Auzoko eskola batera joan ziren agenteak, gizon batek urruntze agindu bat urratu zuelako abisua jaso baitzuten.
«Biktima babestua» den emakume batek deitu zien udaltzainei. Andrearen arabera, bikotekide ohia seme-alaben bila agertu zen auzoko ikastetxean, haiengana hurbiltzea debekaturik bazuen ere epailearen aginduz. Handik hurbil aurkitu zuten agenteek gizona, eta, urruntze agindua indarrean zela ziurtatu ostean, atxilotu egin zuten.
