Ugalketari lotutako doluaren eta amatasunik ezaren inguruko esperientziak landuko dituzte FIAR Arabako sormenaren jaialdi ibiltariaren bigarren aldian. Gasteizko Arkabia kulturgunean egingo dituzte Kore: dolua keinu bihurtzen izeneko sormen saioak, urrian, eta izena emateko epea zabalik dago jada. Orotara hamabost lagunek parte hartu ahal izango dute urriaren 17an, 18an, 24an eta 25ean egingo diren saioetan. Egitasmoaren helburua da isilean bizi izandakoak «espazio seguru batean» lantzea, antolatzaileek azaldu dutenez.
Horretarako, arte eszenikoak, gorputzaren lana, irudia eta sorkuntza kolektiboa uztartuko dituzte, eta bizipen mingarri horiek zaintzaren, laguntasunaren eta sorkuntzaren ikuspegitik landu. Proiektua ugalketa lagunduko prozesuetan ibilitako emakumeentzat pentsatua dago bereziki, eta ama izateko modurik izan ez duten emakumeek saioetan parte hartu ahal izango dute, aukera izan dezaten egoera horrek eragindako gatazkei heltzeko. Parte hartzeko ez da beharrezkoa aldez aurretik inolako diziplina artistikotan esperientziarik izatea.
Saioak Alma Maria Aguado eta Alba Maria Dunas adituek zuzenduko dituzte. Aguado antropologoa, gizarte langilea eta trauma konplexuetan espezialista da. Gainera, arte terapian eta «dolu anbiguoei» lotutako erritual garaikideetan trebatu da sortzaile gisa. Dunas, berriz, Gestalt arte terapeuta, interpretea eta sortzailea da. Haren jarduna laguntza emozionalaren eta sorkuntza artistikoaren arteko loturan oinarritua dago.
