Gasteizko Santa Isabel eta El Salvador hilerrietan ehortzita dauden hildakoen hilobiak «modu erraz eta bisualean aurkitzeko» aplikazio digital berri bat aurkeztu dute gaur goizean. Tresna horri esker, bisitariek beren hurkoak segundo gutxian topa ditzakete, «modu intuitibo eta errespetuzkoan». Udalak 1850. urtetik jasotako 144.000 erregistro informatizatu ditu, eta aplikazio berria erregistro historiko horien digitalizazioaren emaitza da.
Gasteizko Udaleko Administrazioa Modernizatzeko Sailak garatu du aplikazioa, eta QR kodeak instalatuko dira bi hilerrietan. Erabiltzaileek kodea eskaneatu eta hildakoaren izena eta abizena sartzean, berehala agertuko da informazio fitxa: kalea edo etxadia, letra eta zenbakia, heriotza data eta hilerri barruko kokapen zehatza duen mapa. Kointzidentzia bat baino gehiago izanez gero, heriotza data gehituz doitu daiteke bilaketa.
Beatriz Artolazabal Espazio Publikoaren eta Auzoen zinegotziak eman du albistea. Azaldu duenez, «sistema oso bisuala eta erabilerraza» da: «Nahikoa da kodea eskaneatzea eta bi datu betetzea; segundo gutxian, informazioa eta bisitaria orientatzen duen mapa azalduko dira».
Azkenik, zinegotziak gaineratu duenez, aplikazioak giza balio handia du: «Norbaitek maite duen pertsona baten atsedenlekua bilatu nahi duenean, ez du bulegoz bulego ibili nahi, ezta plano zaharrak kontsultatu ere. Erantzun azkarra, zehatza eta errespetuzkoa eskaintzea izan da gure helburua».
