Ikasturte berriarekin batera, piztu da berriz ere euskararen aldeko mugimendua Zigoitian (Araba). Urtero bezala, Zigoitia Euskaraz egitasmoak hartu du iniziatiba, eta herriko egutegi soziokulturaleko topaketa garrantzitsuenetako bat bihurtu da jada. Euskara lantaldeak eta Zigoitiko Udalak elkarlanean antolatzen dute egitaraua, eta helburua argia da: euskaraz bizi, herritarrak batu eta komunitatea indartzea. Aurten, iraileko lehen bi asteburuetan izango dira jarduera nagusiak, hainbat herri eta auzotan banatuta.
Askotariko ekintzez bete dute agenda. Gaur, Okoiztan, bizikleta martxa izango da lehen orduan. Ibilbideak hamaika kilometro inguru ditu, eta herritarrek aukera izango dute zatiren bat egiteko edo ibilbide osoari ekiteko. Antolatzaileek gogorarazi dute nahitaezkoa dela kaskoa eramatea, eta parte hartzea herritar guztiei zabalik dagoela.
Kirolaz eta naturaz gozatu ostean, arratsaldean Bapatean Zirko taldeak emango duen zirku tailerrak kolore eta alaitasun berezia emango dio giroari. Familientzat eta haurrentzat pentsatutako saioa izango da, eta esperientzia kolektibo eta parte hartzailea izatea espero da. Jardunaldia borobiltzeko, parrillada egingo dute bertan bildutakoek, eta gau partean Patxi eta Konpainiaren dantza plazak piztuko du jaia.
Bihar, berriz, kulturak eta ondare historikoak hartuko dute protagonismoa. Murabeko aztarnategian egingo da goizeko ekintza nagusia: Jose Rodriguez arkeologoaren azalpenekin, bertaratuek aukera izango dute Erdi Aroko herrixka baten aztarnak gertutik ezagutzeko. Bisita gidatuaren ondoren, herritarrek musika bidezko esperientzia batez gozatuko dute Gopegiko elizan, Mairu abesbatzaren emanaldiarekin. Kontzertuaren ondoren, luntxa eskainiko da, eta horrela itxiko dute lehenengo asteburua.
Datorren asteburuan gehiago
Datorren asteburua izango da egitasmoaren gailurra. Irailaren 14an, igandean, ospatuko da Zigoitia Euskaraz Eguna, Muruko harrobietan. Leku berezia da harrobiena, paisaia ikusgarri eta harrigarrian kokatua, eta horrek berezitasuna ematen dio egunari. Goizean hasiko da festa, baina eguerdian jarriko da muinean arreta: herri bazkaria egingo dute, paella izango da plater nagusi, bai okeladuna bai begetarianoa, eta edaria, postrea eta kafea barne egongo dira. Txartelak aurrez hartu beharko dira Zigoitiko kultur etxean.
Bazkalostean, kultur eskaintza oparoa izango da. Oketa Alai taldeak dantza emanaldia egingo du, eta, ondoren, Jare taldeko dultzaineroekin egingo den larrain dantzak herritar guztiak batuko ditu dantzan. Arratsaldean, festa handiari amaiera emateko, Argitu taldearen erromeria izango da, eta harrobiak euskararen aldeko kantuen eta dantzen agertoki bilakatuko dira.
Antolatzaileek zenbait ohar ere helarazi dituzte. Batetik, adierazi dutenez, eguraldi txarra egiten badu biharko jarduerak Bengolarra frontoian egingo dira, herritarrek plan alternatibo segurua izan dezaten. Bestetik, Muruko harrobietara sartzeko mugak ezarri dituzte: autoetan zenbat jende sartuko den kontrolatuko da, eta gutxienez lau lagun joan beharko dira auto bakoitzean, pilaketarik ez izateko eta ingurunea babesteko.
Azken urteetan, Zigoitia Euskaraz egitasmoak herri ekimen garrantzitsua izatea lortu du, eta askorentzat udazken hasierako erreferentziazko jaialdia da. Euskararen erabilera sustatzeaz gain, komunitatea elkarrekin gozatzera bultzatzen du, kulturaz, kirolaz eta sormenaz baliatuz. Urtero legez, herriko euskaltzaleek argi dute helburua: euskara ez dadila soilik ikastetxean edo ekitaldi jakinetan erabili, baizik eta kalean, plazan eta bizitzako arlo guztietan.
