Gasteizko Udalak neguko harreraguneetan sakontzeko beste urrats baten berri eman du: kalean bizi diren pertsonentzat behin-behineko baliabide bat jarriko du martxan, Zaramagako Santa Isabel haur eskola izandakoan. Zerbitzua aurtengo neguan aktibatuko da, eta, ondoren, eremua eraberrituko dute 2026aren amaieratik aurrera harrera egonkorreko gunea izan dadin. Harreraguneak 24 leku eskainiko ditu, gaur egun dauden 40 lekuetara gehituta. Zerbitzua ateak irekitzeko egunak izeneko irizpidearen arabera aktibatuko dute: tenperatura oso baxuak daudenean, elurra egiten duenean edo bestelako eguraldi txarra dagoenean.
Lucho Royero Gizarte Politiketako zinegotziak azaldu duenez, hainbat kokapen aztertu ondoren erabaki dute leku berbera erabiltzea neguan laguntza eskaintzeko. Haur eskolako obren lizitazio prozesuarekin batera, behin-behineko baliabide hori jarriko dute martxan, «premia larrienei erantzun azkarra» emateko. Royerok adierazi du lanean ari direla negu honetarako leku guztiak —64 denera— irekita egon daitezen: «Diskrezioz, beste baliabide batzuk bilatzen ari gara, harrera aukera gehiago eskaini eta jende ahulenari arreta duinagoa emateko».
Udalaren helburua da, beraz, neguan beharrik larrienak arintzea eta, epe ertainean, Zaramagako gunea harrera «zerbitzu egonkorra izatea, eta egokitzea, baldintza hobeak izan ditzan».
